四月六號凌晨，巴黎聖日耳門喺法甲第二十八輪以一比零小勝安格斯。仲有六輪聯賽就完季，球隊已經領先第二名摩納哥24分，「大巴黎」成功衛冕，達成法甲四連冠！呢個係佢哋第十三次奪得法甲冠軍，係法甲歷史上奪冠次數最多嘅球隊。法新社話，呢件事反映咗巴黎聖日耳門喺法甲嘅絕對統治地位。
自從卡塔爾財團入主之後，「大巴黎」喺過去十二個球季攞咗十次聯賽冠軍。佢哋仲係今季五大聯賽入面第一支奪冠嘅球隊，仲追平咗法甲連續奪冠嘅第二長紀錄（最長紀錄係里昂嘅七連冠）。
雖然上季射入44球嘅姆巴比已經走咗，但係「大巴黎」嘅進攻依然犀利。到依家為止，球隊今季喺唔同賽事一共踢咗46場，贏咗35場，總共入咗124球。「大巴黎」喺法甲28輪比賽入咗80球，只係比上季34場波少入一球。美聯社話，巴黎聖日耳門喺姆巴比走咗之後，更加注重整體合作，麥巴古拿同杜亞等年輕球員成為核心，球會唔再咁倚賴大牌球星。主帥恩歷克嚴格管教，球隊更加重視球員嘅態度同埋付出。恩歷克仲調整咗迪比利嘅位置，呢位以前嘅右翼而家多數踢中路，佢技術好，速度快，依家以21球排法甲射手榜榜首。
已經提前衛冕嘅巴黎聖日耳門仲有咩目標？法新社話：「呢支冠軍球隊喺聯賽已經攞到23勝5和嘅成績，如果可以保持不敗，佢哋將會成為法甲歷史上第一支成個球季都唔輸波嘅球隊。」除咗聯賽之外，「大巴黎」已經打入法國盃決賽，會同蘭斯爭冠軍。喺歐聯八強，佢哋會同英超嘅阿士東維拉交手，呢支法甲冠軍會繼續爭取今季三冠王！
