「連續擊敗英超球隊嘅感覺？佢哋真係好勁，而我哋係從農民聯賽走出嚟嘅球隊，啱，農民聯賽，不過有時，咁樣都幾正，我哋係支年輕嘅球隊，但踢法好正，我一定要讚吓啲球員，哈哈，你明㗎啦。」呢番說話係巴黎聖日耳門主教練安歷基喺球隊總比分3比1淘汰阿仙奴晉級歐聯決賽之後講嘅。要知道由淘汰賽開始，大巴黎一路擊敗咗利物浦、阿士東維拉同阿仙奴，含金量相當高。喺5年前最終喺歐聯決賽折戟之後，而家嘅大巴黎捲土重來，佢哋今次能唔能夠如願以償呢？
喺1970年成立嘅巴黎聖日耳門，喺歐洲絕對算唔上係歷史悠久嘅豪門，始終到今年，球隊都未夠60年歷史。但係要講佢哋喺法國球壇嘅地位，最近10幾年真係無人能敵。由2011-12球季開始，大巴黎喺法甲聯賽嘅排名從來未低過第2名，換言之，除咗3次攞到聯賽亞軍之外，佢哋已經攞咗10座聯賽冠軍獎盃，其中包括1次4連冠同2次3連冠。喺法國國內，佢哋一早就係無敵嘅存在。
但係喺歐聯賽場上，大巴黎嘅發揮就始終唔令人滿意。自卡塔爾財團入主球隊之後，喺法國國內攞冠軍攞到手軟嘅大巴黎好早就將主要精力放喺爭奪歐聯獎盃上面，但係過去多年嘅嘗試球隊無不遭遇失敗，就算係擁有尼馬、麥巴比同美斯嘅大巴黎，都冇辦法喺呢條歐聯之路上面行得太遠。大巴黎此前唯一一次企到歐聯決賽舞台上面係2019-20球季，當時杜曹執教嘅球隊0比1輸俾狀態更加出色嘅拜仁，同冠軍擦身而過。
其實今個球季嘅大巴黎並冇特別被外界睇好，其中一個主要嘅原因就係麥巴比嘅離隊。法國國腳嘅離開對於成支球隊嚟講肯定有唔細嘅影響，始終佢嘅能力就擺喺度，一個球季少講都能夠為球隊打入40個波。但係安歷基就做到咗呢一點，佢捏合起嚟一支可能係最近10年星味最淡嘅大巴黎，卻踢出咗最好嘅戰績。
呢當中一定要提及一個人嘅名——登貝萊。呢位之前喺巴塞幾乎快被遺忘嘅「傷兵」今個球季發揮有如神助，46場比賽打入33球嘅佢係呢支球隊嘅絕對核心。能夠將佢用好，亦都係安歷基最被人稱道嘅功績之一，始終過往相當長嘅一段時間裏面，幾乎冇人能夠搵到登貝萊嘅「使用說明書」。
一路腳踩三支英超球隊，大巴黎最終重返歐聯決賽。香港時間6月1號凌晨3點，今個球季歐聯決賽將會喺慕尼黑嘅安聯球場上演，大巴黎嘅對手將會係淘汰咗巴塞嘅國際米蘭。係大巴黎首次捧盃，定係國米第4次摘得桂冠，24日後自有分曉。
