姆巴佩嘅律師德爾菲娜-維爾海登，喺昨日深夜舉行新聞發佈會，就同巴黎聖日耳門嘅財務糾紛案，要求巴黎償還拖欠姆巴佩嘅五千五百萬歐元薪金。此外，姆巴佩嘅律師表示已經正式向歐洲足總提出上訴，要求取消巴黎下個球季嘅歐聯資格。
據現場西班牙記者透露，姆巴佩提出呢個要求嘅法律依據，係歐洲足總嘅一條規定：如果參賽球會無向所有球員支付薪金，就不應該授予佢哋歐聯嘅參賽資格。
此外，姆巴佩嘅律師團隊仲正式去信法國足總，要求佢哋促請歐洲足總就巴黎拖欠姆巴佩五千五百萬歐元薪金一事展開調查。
事件嘅起因，要追溯到去去年六月，當時姆巴佩無同巴黎聖日耳門續約，以自由身球員身份加盟皇家馬德里。《隊報》報道指：「雖然皇馬可以免費簽入姆巴佩而感到自豪，但巴黎聖日耳門同納賽爾就覺得非常冇面，佢哋嘅方法就係繼續扣起球員嘅薪金。」
