香港時間6月1號凌晨3點，歐聯決賽喺慕尼黑安聯球場開波，由巴黎聖日耳門對陣國際米蘭。巴黎會衝擊隊史首個歐聯冠軍，國米則希望相隔15年再度封王，第四次捧起「大耳朵杯」。而呢場全球焦點大戰，同時都係一場「亞洲打吡」——李康仁對泰利美。
巴黎陣中，24歲嘅李康仁代表住「亞洲力量」。
兩年前，李康仁由馬略卡轉會去巴黎。到咗2024-25賽季，佢代表巴黎出場45次，交出6球6助攻。不過，歐聯方面11次上陣未有入波。由淘汰賽開始，李康仁基本坐足板凳，對阿士東維拉同阿仙奴兩回合，佢都冇落過場，出場時間係0。
國米方面都有亞洲球員——伊朗前鋒泰利美。
現年32歲嘅泰利美，上年夏天自由身由波圖轉會國米。因為勞塔羅同杜林係主力組合，佢主要係後備。今季各項賽事出場43次，交出3球9助攻，當中歐聯12場入1球送出4助。對巴塞隆拿嘅歐聯四強戰，佢兩場都係後備登場，貢獻過1次助攻。
巴黎 vs 國米今場決賽，唔論邊隊贏，都肯定會有亞洲球員捧起歐聯獎盃。李康仁又好，泰利美都好，佢哋有望成為歷史第2位捧盃亞洲球員。
講起捧過歐聯冠軍嘅亞洲球員，球迷一定會諗起一個名——朴智星。
2007-08賽季，費格遜帶領曼聯奪冠，當時陣中就有韓國人朴智星。雖然佢決賽冇上陣，但仍然係正式歐聯冠軍成員。朴智星亦因此成為第一位、至今唯一奪得歐聯冠軍嘅亞洲球員。
至於歐聯決賽有上陣紀錄嘅亞洲球員，其實有兩位：
-
2008-09賽季決賽，曼聯0比2輸比巴塞，朴智星有上陣
-
2010-11賽季決賽，曼聯1比3再次不敵巴塞，朴智星亦有出場
-
2018-19賽季決賽，熱刺0比2輸俾利物浦，孫興慜踢足全場，落敗後痛哭落地
2008年後，亞洲球員已經17年無緣歐聯冠軍。今次，不論係李康仁定係泰利美，亞洲注定會再有一位球員捧盃。不過，有個「魔咒」要打破——歷史上未試過有亞洲球員喺歐聯決賽上陣兼奪冠。
