大家都知，皇馬今個夏天換教練已經係勢在必行。始終主教練安察洛堤 (Carlo Ancelotti) 已經確認季尾離隊，而且皇馬同新任教練沙維艾朗素 (Xabi Alonso) 嘅談判，亦都進入咗簽約階段。而家唯一嘅疑問係，皇馬開俾艾朗素嘅新合約究竟係咩價位，同時佢哋又係點樣說服利華古遜 (Bayer Leverkusen) 喺夏天放人呢？啱啱就有答案揭曉喇。
根據西班牙媒體《世界體育報》嘅可靠消息，皇馬方面已經正式同利華古遜就教練艾朗素嘅離隊達成共識。利華古遜之所以咁爽快，除咗同艾朗素之間存在君子協定之外。更重要嘅係，上個球季續約嗰陣，艾朗素嘅合約入面加入咗解約金條款。如果之後有豪門球隊邀請艾朗素去執教，利華古遜唔可以設障礙。但係呢個唔代表免費放人，利華古遜一定要得到解約金補償。
之前都有傳媒跟進報道過，有傳解約金係1000萬歐羅。亦都有唔少媒體表示，解約金高達2000萬歐羅，總之眾說紛紜。不過《世界體育報》同埋科貝電台等多間媒體就話，艾朗素嘅解約金實際價格係1500萬歐羅，唔包含任何浮動條款。皇馬如果想簽艾朗素，就一定要俾1500萬歐羅嘅解約金，冇其他辦法。而家皇馬已經接受咗呢個價錢，兩邊嘅談判進展非常順利。
客觀嚟講，1500萬歐羅嘅換帥費用的確唔貴。始終好嘅教練可以頂半隊波，呢句說話絕對唔係講笑。艾朗素如果可以重整皇馬現階段嘅陣容，而且建立新嘅戰術體系嘅話。咁佢哋未來幾個球季嘅成績就可以得到保障。對於皇馬呢種級別嘅豪門嚟講，成績一旦出現起伏，除咗輿論受到影響之外。更重要嘅係，佢哋嘅實際收入同埋獎金分成會受到影響，動輒就係幾千萬歐羅、甚至上億嘅損失。
今個球季就係咁，如果可以及時鎖定艾朗素，而且下個球季成績回升嘅話，咁皇馬呢1500萬無疑係非常超值嘅。呢個就係佢哋接受利華古遜開價嘅原因。當然喇，除咗俾利華古遜嘅解約金之外，皇馬喺個人薪酬方面同樣拿出咗誠意。《世界體育報》表示，沙維艾朗素將會得到一份2+1嘅合約，薪酬待遇遠高於現階段。與此同時，沙維艾朗素亦都被皇馬高層明確告知。喺即將到嚟嘅夏天轉會窗，佢擁有一定嘅轉會決策權。即係話，艾朗素可以按照自己嘅諗法購買球星搭建戰術體系，呢個喺皇馬係難以想像嘅。
因為一直以嚟，皇馬高層對於會決策都係絕對意義上嘅控制。強如施丹 (Zinedine Zidane)、安察洛堤呢啲名帥都好難有話語權。而家可能皇馬高層都喺反思，所以佢哋決定給予艾朗素一啲轉會決策上嘅權利，呢個係非常大嘅讓步。按照而家轉會市場上嘅反饋嚟睇，艾朗素今個夏天執教皇馬已經係板上釘釘。對於佢本人嚟講，呢個係非常大嘅挑戰。豪門球隊尤其係好似皇馬咁，主教練嘅日常壓力係巨大嘅，唔知佢頂唔頂得住。
值得一提嘅係，皇馬換帥嘅費用唔止於此，因為佢哋仲要俾安察洛堤一份解約補償金。根據內部知情人士透露，呢個數字都喺1500萬歐羅左右，呢個係雙方喺續約嗰陣傾好嘅。始終安察洛堤本來想喺舊年離隊，係皇馬主動挽留。而家又要炒佢魷魚，唔俾啲獎金的確講唔過去。咁喺你哋睇嚟，皇馬呢高達3000萬歐羅嘅換帥費用，抵唔抵呢？
