4月21號凌晨，西甲第32輪踢咗4場波。皇家馬德里主場1比0絕殺畢爾包競技；奧沙辛拿作客3比2贏巴拉度列；維拉利爾主場2比2同皇家蘇斯達打和；阿拉維斯作客1比1同西維爾打和。
巴塞隆拿之前2球落後反勝，搞到皇家馬德里壓力山大！事關佢哋歐聯已經出局，淨返聯賽同國王盃，兩項賽事都要同巴塞爭冠軍，士氣又輸人哋一截，如果今場輸波，今季就四大皆空啦！開波之後，皇家馬德里就狂攻畢爾包，但係畢爾包死守伯納烏球場，想攞1分走人。喺畢爾包嚴密嘅防守之下，皇馬機會唔多，停賽嘅姆巴比坐係觀眾席睇波，個樣都幾嚴肅，始終而家最尷尬就係佢啦。
24分鐘，皇馬左路推進，雲尼斯奧斯突破傳中，但係俾對手解圍；35分鐘，莫迪歷罰角球，巴爾維迪頂高；下半場，皇馬繼續壓住畢爾包打，48分鐘，卡馬文加勁射，俾門將西蒙扑出；60分鐘，雲尼斯奧斯妙傳，比寧咸頂高，又俾西蒙扑出；之後比寧咸再頂，擦柱而出；66分鐘，巴爾維迪射高；78分鐘，恩歷克越位，雲尼斯奧斯入波被吹掉。全場狂射28腳都入唔到波，眼見就要喺主場失分，補時階段，迪亞斯突破俾人攔截，巴爾維廸搶返個波，然後勁射，皮球劃過一道靚弧線，直飛球門右上角，皇馬1比0絕殺畢爾包！
積分榜方面，皇馬頂住壓力贏咗波之後，都仲係輸巴塞4分排第2，如果下個月嘅國家打吡贏到巴塞，爭標仲有希望！爭第4方面，畢爾包輸波，維拉利爾原本有機會追上，但係佢哋同皇家蘇斯達打和，只係縮窄咗1分差距，少踢一場落後畢爾包5分。
射手榜方面，利雲度斯基25球繼續領先，姆巴比停賽，仲係落後利雲度斯基3球排第2；山齊士後備上陣無入波，同拉芬拿一樣都係15球排第4；雲尼斯奧斯入波被吹，同盧卡比奧一樣都係11球，剛剛好擠入前十。
