三月廿二日朝早，世界盃南美洲區外圍賽第十三輪，一場重點賽事，由烏拉圭主場迎戰阿根廷。上半場，兩隊你攻我守，都冇入波，羅美路鏟跌咗紐尼斯，搞到場面好混亂；下半場，阿爾華利斯傳波畀阿爾馬達，阿爾馬達射入一球靚波。最後，阿根廷一比零贏咗烏拉圭，攞到廿八分穩坐榜首，如果下一輪同巴西打和，就可以直入世界盃喇！
呢場係世界盃冠軍之間嘅硬仗嚟㗎！阿根廷攞過三次冠軍，烏拉圭攞過兩次。兩隊歷史上踢咗成193場，阿根廷贏咗89場，打和45場，輸咗59場，阿根廷贏得多啲。上次世盃外圍賽，阿根廷主客場都贏咗烏拉圭。
不過，今次世盃外圍賽第一次交手，阿根廷喺主場輸咗比數零比二畀烏拉圭，呢場波係阿根廷攞咗卡塔爾世界盃冠軍之後嘅第一場敗仗。而家，五個月之後再嚟過，阿根廷今次去到人哋地頭踢，梗係想報仇啦！
而家南美洲區嘅積分榜，阿根廷踢咗12場，攞咗25分排第一；烏拉圭踢咗12場，攞咗20分排第二，所以呢場係榜首之爭。
阿根廷贏咗呢場波之後，報咗上次主場輸畀烏拉圭嘅仇，而家攞咗28分，拋離第七名嘅玻利維亞15分咁遠。下一輪只要踢和巴西，就可以提早攞到世盃入場券喇！
