尋日，2024-2025球季歐冠八強全部賽事結束，皇家馬德里（皇馬）再輸波，拜仁慕尼黑（拜仁）都未能反勝，呢兩支勁旅雙雙出局，阿仙奴、國際米蘭（國米）就同巴塞隆拿、巴黎聖日耳門（大巴黎）攜手晉級四強。
衛冕冠軍皇馬畀阿仙奴「雙殺」，阿仙奴相隔16年重返歐冠四強，「兵工廠」同時創歷史，成為各項賽事中首支喺伯納烏球場對住皇馬嘅兩場比賽都贏嘅球隊，佢哋四次對住皇馬保持不敗（三勝一和）。拜仁就以總比數3比4畀國米淘汰。咁樣，喺歐洲五大聯賽之中，德甲就最先「全軍覆沒」。
到依家，歐冠四強出爐，英超、法甲、西甲、意甲每隊都佔一席，兩回合嘅四強賽事會喺呢個月尾同五月頭進行，對賽組合係：阿仙奴對巴黎聖日耳門、巴塞隆拿對國際米蘭。四支球隊之中，阿仙奴同大巴黎喺歐冠最好成績都係亞軍，另外兩隊都曾經奪冠，決賽最大睇點就係歐冠會唔會誕生「新王」。
