6月15號，新制嘅世界冠軍球會盃（世冠盃）將會喺美國開波。到時32支球隊會爭奪最後冠軍。今日，有博彩公司開出咗奪冠賠率，皇馬排第一，曼城緊隨其後。
今屆係改革之後第一屆世冠盃。根據賽程，賽事會喺6月15號至7月13號期間舉行，四年一屆。32支球隊會被分成8個小組，小組採用單循環賽制，每組前兩名晉級16強。由16強開始至決賽都係一場過淘汰賽。
參賽嘅32隊球隊當中，有12隊來自歐洲、6隊南美、亞洲同非洲各4隊，中北美及加勒比地區又有4隊，再加1隊來自大洋洲同1隊東道主美國。基本上，呢32隊都代表咗而家世界上最強嘅球會。不過，巴塞隆拿就無份參賽，主要因為佢哋過幾季喺歐洲賽場表現唔好，積分唔夠。
而家，32支球隊都喺準備緊今屆世冠盃。最新嘅奪冠賠率榜中，皇馬排第一。講真，有啲出人意表，因為皇馬今季表現麻麻。喺歐聯俾阿仙奴踢走，聯賽又俾巴塞剋死咗四次。
第二名係曼城。哥迪奧拿帶領嘅曼城今季戰績都唔算好，球隊士氣偏低。不過博彩公司仲係信得過哥帥喺盃賽有辦法。之前傷咗成年嘅洛迪而家都復出啦。
至於德甲冠軍拜仁、法甲冠軍巴黎聖日耳門、同埋意甲亞軍國際米蘭，就分別排第3至第5位。比較有話題性嘅沙特球會希拉爾同美職球會邁阿密國際，賠率都係67，一齊排第18。
附：世冠盃奪冠賠率前10名：
-
皇馬：4.5
-
曼城：5.5
-
拜仁：7
-
巴黎聖日耳門：9
-
國際米蘭：10
-
車路士：11
-
馬體會：15
-
多蒙特：26
-
祖雲達斯：26
-
賓菲加：34
